മാറ്റ്

 ഓർമ്മകൾക്കൊക്കെയും 

മാറ്റ് കുറഞ്ഞിരിക്കുന്നു...,

നെടുനീളൻ തീവണ്ടി കണക്കേ 

അലമുറയിട്ട് വളഞ്ഞ് 

തിരിഞ്ഞു പായുമ്പോൾ 

തേയ്മാനത്തിനും 

സ്ഥാനമുണ്ടെന്ന 

ഓർമ്മപ്പെടുത്തലാവതെയും വയ്യ.

🖤ആമി🖤

പുഞ്ചിരി

തളിരിലയൊരു നാൾ മുറിഞ്ഞകലാനായ 

പഴുത്ത ഇലയോടു പറഞ്ഞു 

"നീ എന്തിനിങ്ങനെ കടിച്ചുതൂങ്ങണം 

നിൻ്റെ യാത്ര കഴിഞ്ഞതല്ലേ...? "

കേട്ടപ്പോൾ ഒരു പുഞ്ചിരി മാത്രമായിരുന്നു മറുപടി.

ഇളം തെന്നൽ അന്നവളെ ദയനീയമായി നോക്കി, 

പിന്നെ ഒന്നാഞ്ഞു വീശി 

അവസാന ശ്വാസവും പേറി 

ആ ഇല മണ്ണിലേക്ക് പതിച്ചു. 

ഇത് കണ്ട് തളിരില അട്ടഹസിച്ചു.

കൗമാരത്തിൻ്റെ ഹുങ്കാരമോർത്താവണം 

ഇല ഒന്നും പറഞ്ഞില്ല; ഇനി എന്നേക്കും 

മരത്തിൻ്റെ വേരിറങ്ങിയ മണ്ണിൽ ഊർന്നിറങ്ങി പ്രണയത്തിൻ്റെ അത്യുന്നതിയിൽ മയങ്ങുമെന്ന തിരിച്ചറിവിൽ വീണ്ടുമൊന്ന്, 

അവസാനമായി പുഞ്ചിരിച്ചു. 

വേദനയുടെയും സന്തോഷത്തിൻ്റേയും 

നിർവൃതിയുടെയും അടയാളം.

🖤ആമി🖤